CANTA, CANTA RUSIGNOLU

de Giantomaso Mura

Fintzamentas torrau rusignolu

ses tue cun sa durtze melodia.

Chissà it’has pentzau canno in bolu

fias torranno a sa terra nadia.

Ischire haia a chellere it’has bidu,

chi fusti solu o pur’in cumpagnia.

Chi ses torrau a ti faere su nidu

fias in cumpagnia certamente;

inue has tentu approdu, in cale lidu

o in cale lontanu continente

de umbrosas pramas o caldu desertu;

chi fias allirgu o puru sufferente,

in litu fusti o in su campu apertu,

in frittu monte o in s’amena serra.

Ca has bidu cosa meda seo certu

Hasa ‘idu is Segnores de sa Gherra

chi hanta istintu vengosu e crudele

ponenno cuddos debiles a terra.

Ma tue ca a s’amore ses fidele

ti ses moviu appenannodi in prantu;

cun su cantu indurtziu has cussu fele.

Chi torras a b-annare atteruetantu

sa vida a nemos nara chi ddi privet

fatzat unu giardinu in campusantu,

ca un’omine deasi depet bivere,

semper serenu e meda isperantzosu

e chi mai nessunu si nn’attrivet

de ddi toccare a chie tenet gosu

ca su gosu est unu donu mannu

po chie bivit afflittu e penosu.

Ma tue daghi torras, dogni annu,

attraessanno dae nou su mare

canta e consol’a chi’ est in affannu

po chi nemos prus depat penare;

tanti sa vida nosta est un alenu,

finas po te chi sighis a bolare.

Canno su ‘entu si pesat lenu lenu

e ti ninnat cun d-una fortza arcana

po no essere in domo che s’agnenu

torra a cantare sutta ‘e sa ventana,

ogni ‘eranu, in pratza ‘e omo mia,

chi mai restet cust’idea vana.

Nammi: inue s’agattat s’armonia?

Fortzis est addeni che is isteddos

o est solu una vana fantasia

chi morit canno morint is foeddos?